पाल्पा । पाल्पाको बगनासकाली गाउँपालिका–२ की गीता पाण्डेको असुरक्षित गर्भपतनका क्रममा मृत्यु भएको घटना सार्वजनिक भएको छ। निजी क्लिनिक र स्वास्थ्यकर्मीहरूको लापरबाहीका कारण उनको ज्यान गएको भन्दै मृतकका परिवारले गम्भीर आरोप लगाएका छन् ।
बुटवल उपमहानगरपालिका–९, इट्टाभट्टीस्थित खत्री नर्सिङ होममा नियमित गर्भ परीक्षण गराउँदै आएकी पाण्डे उपचारकै क्रममा विभिन्न क्लिनिक र फार्मेसी धाउँदै जाँदा ज्यान गुमाउन पुगेकी हुन्। गत चैत २७ गते गरिएको भिडियो एक्स–रेमा गर्भको अवस्था असामान्य देखिएको भन्दै चिकित्सकले गर्भपतनको सल्लाह दिएका थिए। त्यसपछि उनले चिकित्सककै सुझावअनुसार गर्भपतन गर्ने निर्णय लिएकी थिइन्।
वैशाख ५ गते श्रीमानसहित बुटवल आएकी पाण्डे खत्री नर्सिङ होममा फलोअपका लागि पुगेकी थिइन्। त्यहाँबाट उनलाई थप उपचारका लागि जोनल फार्मेसीमा पठाइएको थियो। उक्त फार्मेसीमा कार्यरत स्वास्थ्यकर्मीले औषधि प्रयोगमार्फत गर्भपतन गराउने प्रक्रिया अघि बढाएका थिए।
स्वास्थ्यकर्मीले उनलाई सोही दिन राति १० बजे एक खुराक र भोलिपल्ट बिहान ६ बजे अर्को खुराक औषधि सेवन गर्न निर्देशन दिएका थिए र आइतबार बिहान १० बजे पुनः फार्मेसी आउन भनिएको थियो। तर निर्धारित समयमा फार्मेसी पुगेकी पाण्डे घर फर्किन भने पाइनन् ।
जोनल फार्मेसीमा गरिएको उपचार सफल नभएपछि उनलाई सोही क्षेत्रको इन्दुलेखा क्लिनिकमा लगिएको थियो। त्यहाँ पनि पुनः औषधि प्रयोग गरेर गर्भपतन गराउने प्रयास गरिएको प्रारम्भिक अनुसन्धानबाट खुलेको छ। लगातार औषधिको प्रयोगपछि उनको स्वास्थ्य अवस्था गम्भीर बनेको थियो।गम्भीर अवस्थामा पुगेकी पाण्डेलाई अन्ततः लुम्बिनी सिटी अस्पताल पुर्याइएको थियो, जहाँ चिकित्सकले उनलाई मृत घोषणा गरेका थिए।
प्रारम्भिक तथ्यहरूले विशेषज्ञ चिकित्सकको प्रत्यक्ष निगरानीबिना नर्सिङ होम, क्लिनिक र फार्मेसीमार्फत असुरक्षित रूपमा औषधि प्रयोग गरिएको देखाएको छ, जसले घटनामा गम्भीर लापरबाही भएको आशंका बलियो बनाएको छ।
इलाका प्रहरी कार्यालय बुटवलका प्रमुख प्रहरी नायव उपरीक्षक निशान्त श्रीवास्तवका अनुसार मृतकका श्रीमानले जाहेरी दिएपछि घटनाबारे अनुसन्धान सुरु गरिएको हो। “घटनामा संलग्न फार्मासिस्ट र सञ्चालकलाई नियन्त्रणमा लिएका छौं, आवश्यक परे अन्य चिकित्सकलाई पनि अनुसन्धानका लागि ल्याइनेछ,” उनले बताए।
घटनासँग सम्बन्धित स्वास्थ्य संस्थाका तीन जनालाई प्रहरीले पक्राउ गरिसकेको छ। पक्राउ पर्नेमा खत्री पोलिक्लिनिककी सन्ध्या बस्नेत, जोनल क्लिनिककी निलम घर्तीमगर र इन्दुलेखा क्लिनिकका खगेन्द्र पाण्डे रहेका छन्।
अनुसन्धानका क्रममा इन्दुलेखा क्लिनिक दर्ता नभएको खुल्न आएको छ। त्यस्तै जोनल फार्मेसीमा सेवा दिने डा. विष्णु गौतम घटना भएको दिन उपस्थित नरहेको र त्यहाँबाट अन्यत्र रिफर गरिएको समेत स्रोतले जनाएको छ। खत्री नर्सिङ होममा डिबी खत्री र इन्दुलेखा क्लिनिकमा डा. सतिश रुपाखेतीले सेवा दिँदै आएका छन्।
यस घटनाले बुटवल क्षेत्रमा अवैध रूपमा सञ्चालन भइरहेका क्लिनिक तथा फार्मेसीहरूको अवस्था पुनः उजागर गरेको छ। सम्बन्धित निकायको अनुमति र दक्ष चिकित्सकको निगरानीबिना सेवा दिने प्रवृत्तिले यस्ता जोखिमपूर्ण घटना दोहोरिने खतरा बढाएको सरोकारवालाहरूको भनाइ छ।
बुटवलसहित विभिन्न स्थानमा सञ्चालनमा रहेका अवैध स्वास्थ्य संस्थामा उपचार गराउँदा लापरबाहीका कारण महिलाहरूले अकालमै ज्यान गुमाउने घटनाले चिन्ता थपेको छ। केही क्लिनिक र त्यहाँ कार्यरत स्त्रीरोग विशेषज्ञहरूले असुरक्षित गर्भपतनका गतिविधि सञ्चालन गरिरहेको समेत पाइएको छ।
सम्बन्धित खवर
